Музей размешчаны ў будынках былога сядзібнага дома і прысядзібнага флігеля - помніках архітэктуры другой паловы XVIII – XIX стст.на тэрыторыі Лошыцкага сядзібна-паркавага комплексу.
У 2014 годзе завяршыліся работы па рэстаўрацыі сядзібнага дома: адноўлены архітэктурныя элементы, фрагменты жывапіснага дэкору, ляпніна, рэканструяваны ўнікальныя кафляныя печы і камін.
Экспазіцыя музея знаёміць з гісторыяй Лошыцы і Лошыцкай сядзібы. Прадстаўлены адноўленыя інтэр'еры жылога дома з сапраўднымі прадметамі канца XVIII-пачатку ХХ стст.
У прысядзібным флігелі працуе доўгатэрміновы выставачны праект" Кола часу " - прадметы матэрыяльнай культуры Мінска і наваколля канца XIX - першай паловы ХХ стст.
Экспазіцыя ўключае адноўленыя жылыя інтэр'еры сядзібы: вялікую і малую гасціныя, бальную залу, кабінет, буфетную, сталовую, канапавую, аформленыя ў стылях мадэрна, неаракока, гістарызму.
У інтэр'ерах прадстаўлена мэбля, прадметы побыту, дэкаратыўна-прыкладнога мастацтва, жывапіс, графіка з фондаў Музея гісторыі горада Мінска, Музея «Замкавы комплекс «Мір», Нацыянальнага мастацкага музея Рэспублікі Беларусь, а таксама з прыватных збораў калекцыянераў.
Гістарычны раздзел экспазіцыі знаёміць з этапамі станаўлення і развіцця Лошыцы і Лошыцкай сядзібы з X стагоддзя да нашых дзён.
У выставачнай зале музея праходзяць часовыя тэматычныя выставы.
Музей праводзіць разнастайныя экскурсіі, у тым ліку і з наведваннем прылеглага парку, майстар-класамі і музычнымі праграмамі па папярэднім запісе.
